व्हिजन संगमनेर 2.0 साठी जनतेचा जाहीरनामा प्रभावीपणे राबवणार
संगमनेर ( प्रतिनिधी ) लोकनेते बाळासाहेब थोरात व माजी आमदार डॉ.सुधीर तांबे यांच्या नेतृत्वाखाली सातत्याने विकासाच्या योजना राबवल्यामुळे संगमनेर हे राज्यातील प्रगतशील व वैभवशाली शहर म्हणून ओळखले जात आहे. मात्र मागील काही दिवसांपासून शहरावर होणारे बाहेरचे आक्रमण रोखण्यासाठी शहरातील स्वाभिमानी नागरिकांनी राजकीय विचार बाजूला ठेवून संगमनेर सेवा समिती स्थापन केली आहे. यामध्ये महाविकास आघाडीसह सर्व समविचारी पक्ष असून या मार्फत जनतेचा जाहीरनामा प्रभावीपणे राबवण्यासाठी सर्व उमेदवार कटिबद्ध असल्याचे आमदार सत्यजीत तांबे यांनी म्हटले आहे.
शहराच्या विकासासाठी लोकनेते बाळासाहेब थोरात यांनी सातत्याने निधी आणला मात्र मागील एक वर्षांमध्ये घोषणा झाल्या एक रुपयाचा निधी आला नाही किंवा ज्या मार्फत निधी आला त्या खात्याकडे एक रुपयाचा निधी शिल्लक नाही ही वस्तुस्थिती आहे.अनेक सक्षम उमेदवार उमेदवारीची मागणी करत होते परंतु संख्या खूप असल्याने अनेक अडचणी झाल्या तरीही अनेक जण संगमनेरकर म्हणून शहराच्या विकासासाठी माघार घेतील अशी अपेक्षा व्यक्त करताना नागरिकांचा जाहीरनामा घेऊन आपण काम करणार असल्याचे ते म्हणाले. याकरता 11 जुने नगरसेवक असून 19 नव्या उमेदवारांना संधी दिली असल्याचे आमदार सत्यजित तांबे यांनी सांगितले.
कोणताही नगरसेवक प्रत्यक्ष किंवा अप्रत्यक्ष ठेकेदारी करणार नाही
नगरसेवक पद हे जनतेच्या सेवेसाठी आहे म्हणून सर्व जे उमेदवार आहे त्यांच्याकडून प्रतिज्ञापत्र घेतले आहे की ते नगरपालिकेच्या कामात प्रत्यक्ष किंवा अप्रत्यक्ष कुठेही ठेकेदारीमध्ये सहभाग घेणार नाही किंवा ठेकेदारी करणार नाही.
डॉ. मैथिली तांबे उच्चशिक्षित
लोकनेते बाळासाहेब थोरात, मा.आ.डॉ.सुधीर तांबे यांच्या मार्गदर्शनाखाली सुसंस्कृत व वैभवशाली शहराची वाटचाल सुरू आहे हे काम आपल्याला कायम ठेवायचे असून संगमनेर 2.0 अंतर्गत नवीन व्हिजन घेऊन डॉक्टर मैथिलीताई तांबे यांना नगराध्यक्षपदाची उमेदवारी दिली आहे. बीडीएस डॉक्टर असलेल्या व सातत्याने समाजकारण व शिक्षण आणि लहान मुलांसाठी सक्रिय काम करणाऱ्या मैथिलीताई तांबे या नक्कीच चांगले काम करून संगमनेरचे नाव आणखी पुढे नेतील असा ठाम विश्वास आमदार सत्यजीत तांबे यांनी व्यक्त केला.
