संगमनेरमध्ये गुरुवारी भाऊबीज निमित्त रंगणार दिवाळी पहाट गाणी
18 वर्षांची परंपरा असलेला सांस्कृतिक उपक्रम
संगमनेर ( प्रतिनिधी ) संगमनेरच्या सांस्कृतिक परंपरेचा मानबिंदू अशी ओळख असलेला दिवाळी पहाट गाणी हा कार्यक्रम गुरुवारी दिनांक 23 ऑक्टोबर 2025 रोजी सकाळी 6 वाजता भंडारी मंगल कार्यालय येथे आयोजित करण्यात आले असल्याची माहिती एकविरा फाउंडेशनच्या अध्यक्ष जयश्रीताई थोरात आणि वंचित बहुजन आघाडीच्या राज्य प्रवक्त्या उत्कर्षा रूपवते यांनी केले आहे.
दीपावली पहाट गाणी या कार्यक्रमाबाबत अधिक माहिती देताना डॉ.जयश्रीताई थोरात म्हणाल्या की, लोकनेते बाळासाहेब थोरात यांच्या मार्गदर्शनाखाली संगमनेर शहर हे सांस्कृतिक दृष्ट्या वैभव संपन्न असून मागील अठरा वर्षांपासून सातत्याने या कार्यक्रमाचे आयोजन केले जाते.
संगमनेर इतिहास संशोधन मंडळ आणि संगमनेर वाचन कट्टा यांच्या पुढाकारातून होत असलेल्या या कार्यक्रमाला माजीमंत्री बाळासाहेब थोरात, माजी आमदार डॉ.सुधीर तांबे, नाशिक पदवीधर मतदार संघाचे आमदार सत्यजित तांबे, माजी नगराध्यक्ष सौ.दुर्गाताई तांबे, अमृतवाहिनी बँकेचे चेअरमन सुधाकर जोशी हे प्रमुख अतिथी म्हणून उपस्थित राहणार आहेत.